பகத்சிங்கை வாசியுங்கள்! மற்றதை அவன் பார்த்துக்கொள்வான்!

கடந்த 2009ல் பகத்சிங்கின் நினைவுகளில் இட்ட பதிவை நினைத்துப் பார்க்கிறேன்.

எல்லாவற்றையும்

சகித்துக்கொண்டு...

சராசரி மனிதனாய்

வாழமுடிகிறது!

உனது சுட்டெரிக்கும்

பார்வையையும்

உன் வாழ்க்கை

எனக்குள் எழுப்புகிற

குடைச்சல்களை தான்

என்னால்

என்றும்

எதிர்கொள்ள முடியவில்லை!

***

பகத்சிங்

பிறந்தது : 27.09.1907

தூக்கிலிடப்பட்ட நாள் : 23.03.1931 (வயது - 23)

***

கடந்த பத்து ஆண்டுகளில் நான் படித்த வரலாறுகளில் மிகுந்த மன எழுச்சியை தந்தது பகத்சிங் மற்றும் அவர்களுடைய தோழர்களின் வரலாறு தான்!

சூரியன் மறையாத சம்ராஜ்யம் எங்களுடையது என பெருமை பீத்திய வெள்ளை அரசாங்கம், பகத்சிங், சுகதேவ், இராஜகுரு மூவரையும் மறுநாள் காலை  தூக்கில் போடுவதாக அறிவித்துவிட்டு, எழும் போராட்டங்களுக்கு தனது அரசாங்கம் தாங்காது என பயந்து முதல்நாள் மாலையிலேயே தூக்கில் போட்டது!  உடல்களை கூட உறவினர்களுக்கு தராமல், திருடனைப் போல இரவோடு இரவாக நதிக்கரையில் உடல்களை எரித்தது.

ஒருமுறை ஒரு அரசியல் ஏட்டைப் பற்றி ஒருவர் சொல்லும் பொழுது, இந்த புத்தகத்தை எல்லாம் படித்துவிட்டு, எளிதாக கடந்து போய்விடமுடியாது.  தீயை முழுங்கியது போல, சும்மா இருக்கவிடாது! என்றார். அவர் சொன்ன வார்த்தைகள் பகத்சிங்கின் வாழ்க்கைக்கு மிக சரியாக பொருந்தும்! 

பகத்சிங்கை வாசியுங்கள்! பிறகு உங்களால் பழைய சுயநலமான வாழ்க்கையை தொடரமுடியாது! உங்கள் வாழ்க்கையின் திசையை சரியாக கொண்டு செலுத்துவான்!

நாளை அவர்களுக்கு நினைவு நாள்! பகத்சிங்கும் அவர்களுடைய தோழர்களும் கண்ட கனவை நனவாக்குவோம்!

எழுவர் விடுதலையும், ஜெ.வின் பிரதமர் கனவும்!

எழுவரை விடுதலை செய்ததில் மட்டற்ற மகிழ்ச்சி! நேற்று விடுதலை விசயம் கேள்விப்பட்டதும் முகநூலில் என்னுடைய மகிழ்ச்சிகளை பகிர்ந்துகொண்டேன். அவர்களுடைய விடுதலை கோரிக்கைக்கான பல போராட்டங்களில் நானும் கலந்துகொண்டிருக்கிறேன். இந்த விடுதலைக்கு பின்னால், பல புரட்சிகர அமைப்புகள், ஜனநாயக, முற்போக்கு அமைப்புகளின் விடாப்பிடியான போராட்டங்கள் இருந்திருக்கின்றன.

தமிழகம் முழுவதுமே மக்கள் போராடியிருக்கிறார்கள். ஜெ.வை சட்டமன்றத்தில் தீர்மானம் போட வைத்ததில் மக்கள் போராட்டத்திற்கு பங்குண்டு. விடுதலை குறித்து அரசு வெளியிட்ட பத்திரிக்கை செய்தியில், ஜெ.வே இந்த விசயத்தை ஒத்துக்கொண்டிருக்கிறார்.

ஜெ. விடுதலை செய்ததை பலரும் பாராட்டுகிறார்கள். தப்பில்லை.ஆனால் அமைப்புகளின், மக்களின் போராட்டங்களை மறந்துவிட்டு அல்லது மறைத்துவிட்டு விடுதலை செய்ததற்காக ஜெ.யின் தைரியம் பிரமாதம். அம்மா இப்படித்தான் அதிரடியாக பல பிரச்சனைகளை தீர்ப்பவர். அப்படி, இப்படி என இன்னும் என்னனென்னவோ புல்லரித்துப்போய் எழுதி, ஜெவை. பிரதமராக்கலாம் என இந்தியாவை ஜெ.வின் காலடியில் வைப்பதை நாம் அனுமதிக்கமுடியாது. நாட்டை கொள்ளையிட்டு கொண்டும், இன்னமும் மொத்தமாக கொள்ளையிட காத்திருக்கும் பல கழுகுகளுக்கு ஜெ.வைப் போல பாசிஸ்டு இருந்தால், நன்றாக இருக்கும் என காத்துக்கொண்டிருக்கிறார்கள். அதனால்தான், டுபாக்கூர் மோடியை கூட வானாளாவ புகழ்ந்து தள்ளுகிறார்கள்.

தமிழ்நாட்டில் ஜெ.விடம் அடிவாங்காத பிரிவினர் உண்டா?  இரண்டு மாதங்களுக்கு முன்பு கூட கண் தெரியாத மாற்றுத்திறனாளிகள் தங்களுடைய நியாய கோரிக்கைகளுக்காக போராடும் பொழுது, மிக மோசமாக நடத்தியவர் தான் இந்த ஜெ.

நாம் எப்பொழுதும் பழசை மறந்துவிடக்கூடாது!

கூடங்குளம்! - கவிதை

அவர்கள் காத்திருக்கிறார்கள்
நாம் வருவோம் என்ற நம்பிக்கைகளோடு

அவர்கள் காத்திருக்கிறார்கள்
நாம் வரும்வரை காத்திருப்போம் என்ற உறுதியோடு

அவர்கள் காத்திருக்கிறார்கள்
நமக்கும் அது புரியுமென்ற உறுதியோடு

அவர்கள் காத்திருக்கிறார்கள்
நமது கைகள் அவர்கள் கைகளோடு கோர்க்கும் என்ற தோழமையோடு

அவர்கள் காத்திருக்கிறார்கள்
நமது வாரிசுகளின் எதிர்காலத்தையும் தமது தோள்களில் சுமந்தபடி

அவர்கள் காத்திருக்கிறார்கள்
விடியல் தேடி நாலாபுறமிருந்தும்
அவர்களின் கூடாரங்கள் நோக்கி
நாம் அணிவகுத்து வருவோம் என்ற கனவுகளோடு

அவர்கள் காத்திருக்கிறார்கள்
நமக்கும் சேர்த்து ஆண்டுகள் மூன்றாய்
அயராது போராடிக் கொண்டே

அவர்கள் காத்திருக்கிறார்கள்
தங்கள் உயிரையும் வாழ்வையும் துச்சமென முன்வைத்து.
நமது படையணிகள்
எல்லாபுறமும் சூழந்து எதிரிகளை திக்குமுக்காடச் செய்யுமென்ற லட்சியத்தோடு

அவர்கள் காத்திருக்கிறார்கள்
மக்கள் மகத்தானவர்கள் என்ற கம்பீரத்தோடு!

- மகேஷ்