'Trust heights' - 11 மாடி கட்டிடம் சரிவு!

போரூர் சிக்னலிலிருந்து குன்றத்தூர் போகிற வழியில் 11 மாடி குடியிருப்பு கட்டிடம் இரண்டில் ஒன்று இன்று மாலை 5 மணியளவில் மண்ணுக்குள் இறங்கிவிட்டதாகவும், மீதி சரிந்துவிட்டதாகவும் சொல்கிறார்கள்.

அருகில் போய்ப் பார்க்க முயற்சி செய்தேன். காவல்துறையை குவித்து வைத்து, பொதுமக்களை போகவிடாமல் தடுத்து நிறுத்திவிட்டார்கள்.

தூரத்தில் இருந்து பார்த்ததில் 70% கட்டிட வேலை முடிந்துவிட்டது. 2014ல் அனைத்து வேலைகளும் முடிந்துவிடும் என விளம்பரத்தியிருக்கிறார்கள்.  மாலை 5 மணி என்பதால் தொழிலாளர்கள் நிறைய பேர் வேலை செய்ததாக சொல்கிறார்கள். ஆந்திர மாநிலத்தை சேர்ந்தவர்களும், திருவண்ணாமலையை சேர்ந்தவர்களும் அங்கு 100 பேர்வரை வேலை செய்து கொண்டிருந்ததாக அங்கிருந்த ஒன்றிரண்டு பேர் பேசிக்கொண்டிருந்தனர்.

டபுள் பெட்ரூம், டிரிபிள் பெட்ரூம் என வசதியானவர்களுக்கான கட்டப்பட்ட குடியிருப்பு கட்டிடம் இது! பல‌ தொழிலாளர்கள் வியர்வை சிந்தித்தான் கட்டிடங்களை எழுப்புகிறார்கள். பொறுப்பற்றவர்களால் இப்பொழுது உயிர்களையும் கொடுக்கவேண்டியதாகியிருக்கிறது!

கிளம்பும் பொழுது கட்டிடத்தின் வாசலில் அந்த போர்டு இருந்தது!

"Trust Heights"

இனி செய்யவேண்டிய பாதுகாப்பு நடவடிக்கைகள் குறித்து முதலாளித்துவ ஊடகங்கள் வரிசையாக பட்டியலிடுவார்கள்! நாம் வேடிக்கைப் பார்த்துக்கொண்டிருக்கவேண்டியது தான்!

வீடுகளை விற்பதற்கு Prime sristi நிறுவனம் யூ டியுப்பில் வெளியிட்ட காணொளி இது!

http://www.youtube.com/watch?v=fR3cmwdByuA

எழுவர் விடுதலையும், ஜெ.வின் பிரதமர் கனவும்!

எழுவரை விடுதலை செய்ததில் மட்டற்ற மகிழ்ச்சி! நேற்று விடுதலை விசயம் கேள்விப்பட்டதும் முகநூலில் என்னுடைய மகிழ்ச்சிகளை பகிர்ந்துகொண்டேன். அவர்களுடைய விடுதலை கோரிக்கைக்கான பல போராட்டங்களில் நானும் கலந்துகொண்டிருக்கிறேன். இந்த விடுதலைக்கு பின்னால், பல புரட்சிகர அமைப்புகள், ஜனநாயக, முற்போக்கு அமைப்புகளின் விடாப்பிடியான போராட்டங்கள் இருந்திருக்கின்றன.

தமிழகம் முழுவதுமே மக்கள் போராடியிருக்கிறார்கள். ஜெ.வை சட்டமன்றத்தில் தீர்மானம் போட வைத்ததில் மக்கள் போராட்டத்திற்கு பங்குண்டு. விடுதலை குறித்து அரசு வெளியிட்ட பத்திரிக்கை செய்தியில், ஜெ.வே இந்த விசயத்தை ஒத்துக்கொண்டிருக்கிறார்.

ஜெ. விடுதலை செய்ததை பலரும் பாராட்டுகிறார்கள். தப்பில்லை.ஆனால் அமைப்புகளின், மக்களின் போராட்டங்களை மறந்துவிட்டு அல்லது மறைத்துவிட்டு விடுதலை செய்ததற்காக ஜெ.யின் தைரியம் பிரமாதம். அம்மா இப்படித்தான் அதிரடியாக பல பிரச்சனைகளை தீர்ப்பவர். அப்படி, இப்படி என இன்னும் என்னனென்னவோ புல்லரித்துப்போய் எழுதி, ஜெவை. பிரதமராக்கலாம் என இந்தியாவை ஜெ.வின் காலடியில் வைப்பதை நாம் அனுமதிக்கமுடியாது. நாட்டை கொள்ளையிட்டு கொண்டும், இன்னமும் மொத்தமாக கொள்ளையிட காத்திருக்கும் பல கழுகுகளுக்கு ஜெ.வைப் போல பாசிஸ்டு இருந்தால், நன்றாக இருக்கும் என காத்துக்கொண்டிருக்கிறார்கள். அதனால்தான், டுபாக்கூர் மோடியை கூட வானாளாவ புகழ்ந்து தள்ளுகிறார்கள்.

தமிழ்நாட்டில் ஜெ.விடம் அடிவாங்காத பிரிவினர் உண்டா?  இரண்டு மாதங்களுக்கு முன்பு கூட கண் தெரியாத மாற்றுத்திறனாளிகள் தங்களுடைய நியாய கோரிக்கைகளுக்காக போராடும் பொழுது, மிக மோசமாக நடத்தியவர் தான் இந்த ஜெ.

நாம் எப்பொழுதும் பழசை மறந்துவிடக்கூடாது!

கெளரவம் ‍- அழுத்தமில்லை!

'கெளரவக் கொலை' என்பது தவறான வார்த்தை பயன்பாடு.  'சாதி வெறிக்கொலை' என்பது தான் அர்த்தம் பொதிந்த சரியான வார்த்தை.

இந்தியா முழுவதும் நடக்கும் சாதிவெறிக்கொலைகளை பற்றிய படம் என்பது கெளரவமான விசயம் தான். ஆனால், அழுத்தமில்லாத படமாக வந்திருப்பது தான் பெரிய வருத்தம். :(

*****

கதை எனப்பார்த்தால்...

நாயகன் தன்னுடன் படித்த நண்பனை தேடி  எதைச்சையாய் கிராமத்திற்குள் வருகிறான்.  தலித்தான நண்பன், ஆதிக்க சாதியைச் சேர்ந்த பெண்ணை காதலித்து இருவரும் ஊரைவிட்டு ஓடிப்போனதாக சொல்கிறார்கள்.

நண்பனின் அப்பா மகனை தேடித்தர கோருகிறார்.  அதற்கான முயற்சிகளில் இறங்கும் பொழுது பல அதிர்ச்சியான தகவல்கள் வருகிறது!

****

இரட்டை குவளை தேநீர் கடை, சாதிக்கலவரம் நடந்த ஊர் என சாதி தீண்டாமையை கடைப்பிடிக்கிற ஊராக காட்டுகிறார்கள்.  படத்தில் ஓர் இடத்தில் நாய்கன் சொல்வார்.  'பாரதிராஜா கிராமம் போல இருக்கும்' என நினைச்சேன் என்பார். இந்த கிராமம் இராதாமோகனின் கிராமமாக இருக்கிறது. அவ்வளவு தான்.

ஆதிக்க சாதி வெறி ‍ தலித் அவலநிலை என்பதை காட்டும்பொழுது மனம் பதறவேண்டாம். காட்சியில் அழுத்தமே இல்லாதது தான் காரணம்.

ஒரு நடுத்தர வர்க்கத்தை சேர்ந்த ராதாமோகன் தலித்துகளின் நிலை பார்த்து 'அச்சச்சோ' என்பதாக பரிதாபப்பட்டு எடுத்த படமாக‌ இருக்கிறது.

வழக்கமான பாடல், ஆடல் என ஒரு வணிகப்படத்திற்கான எல்லா அம்சங்களும் இருக்கின்றன. ஆபாசம் இல்லை. அது ஒன்று தான் வித்தியாசம்.

பாடல்கள் சுமார். பாடல்களை எடுத்துவிட்டாலும் பெரிய பாதிப்பு இருக்காது.  நாயகன் பாத்திரத்திற்கு பொருத்தமில்லாத நபராக இருக்கிறார். சிலர் நன்றாக செய்திருக்கிறார்கள்.

சென்னையில் சாதி பார்ப்பதில்லை என்பதாக படத்தில் ஒரு வசனம் வருகிறது. இதெல்லாம் நல்லெண்ண கருத்து. என் ஐந்து வருட சென்னை வாழ்வில் இரண்டு சம்பவங்கள் எனக்கே ஏற்பட்டிருக்கிறது.

ஒரு நேர்முக தேர்வுக்கு போனபொழுது, அந்த நிர்வாகி என் சாதியை கேட்டார்.  சாதியையும் நான் சொல்லவில்லை. வேலையும் கிடைக்கவில்லை.

என் பாஸின் நண்பர் ஒருவர் (அய்யர்) வீடு கட்டி குடிபுகுந்தார். அலுவலக ஊழியர்களை அழைக்கவில்லை.  பின்னாளில், எங்க பாஸே சொன்னார். அலுவலகத்தில் இரண்டு ஊழியர்கள் தலித்துகள். அதனால் தான் அழைக்கவில்லை என்றார்.

இப்படிப்பட்ட தீண்டாமை கடைப்பிடிக்கும் கிராமங்கள் தமிழகத்தில் 70களில் தான் இருந்ததாக தினமலர் எழுதியிருக்கிறது.  மிகப்பெரிய பூசணிக்காயை சோற்றில் மறைக்க பார்க்கிறார்கள்.

என் நினைவிலிருந்து...சாதி வெறியை இயல்பாய், காத்திரமாய் காட்டிய படம் பருத்திவீரன். உணர்வு தளத்தில் 'பாரதி கண்ணம்மா' பேசியிருக்கும்.

சமூகத்தில் மனிதர்களை இழிவுப்படுத்துகிற ஒரு கொடுமையான நிகழ்வை ஒரு அழுத்தமான பதிவாக தர முயலாமல், மேலோட்டமான, அழுத்தமில்லாத படமாக வெளிவந்திருக்கிறது கெளரவம்.

இப்படி படத்தை எடுத்துவிட்டு, "நல்ல படம் எடுத்தோம். மக்கள் ஆதரிக்கவில்லை" என்று வேறு சொல்வார்கள்.  அதைக் கேட்பது தான் கடுப்பாக இருக்கும்.

ஈழம் : போராட்ட செய்திகள் இனிமையானவை!

கடந்த ஒரு வார காலத்திற்கும் மேலாக செய்தி சானல்களை பார்க்க அவ்வளவு ஆசை ஆசையாக இருக்கிறது.

ஈழத்தில் நடந்த இனப்படுகொலைகளுக்கு பிறகு, ஈழ மக்களின் வாழ்வு புனரமைப்பு மற்றும் அமைதி நடவடிக்கை குறித்து இலங்கை அரசின் மீது, அமெரிக்கா ஐக்கிய நாட்டு சபையில் ஒரு தீர்மானம் கொண்டு வர இருக்கிறது.

இதை ஒட்டி தமிழகமெங்கும் மாணவர்களும், அனைத்து தரப்பினரும் தமிழகத்தின் பல்வேறு பகுதிகளில் போராடி வரும் செய்திகளை தொடர்ச்சியாக சொல்லிக்கொண்டே இருக்கிறார்கள். பார்க்க பார்க்க அவ்வளவு அருமையாக இருக்கிறது.

ஆனால் போராடுபவர்களின் கோரிக்கைகளை பரிசீலித்தால்...

அமெரிக்க தீர்மானத்தின் தரம் படு மொக்கையானது. சாரமில்லாமல் வெறும் சக்கையானது.  இலங்கை உள்ளூர் ரவுடி என்றால் அமெரிக்கா உலக ரவுடி. உலகத்தில் போர்க்குற்றத்திற்காக தண்டிக்கப்பட வேண்டுமென்றால், முதலில் தண்டிக்கப்பட வேண்டிய ஆள் அமெரிக்கா தான். இப்பொழுது அமெரிக்காவையே நீதிபதியாக மாற்றுவது அபத்தமானது.

அடுத்து, இந்தியா அமெரிக்க தீர்மானத்தை ஆதரிக்க வேண்டும் என்பது...

அமெரிக்க தீர்மானமே மொக்கையானது.  இனப்படுகொலையில் இலங்கை முதல் குற்றவாளி என்றால், இரண்டாவது குற்றவாளி இந்தியா.  ஈழத்து மக்களின் ரத்தக்கறை படிந்தவர்களையே தீர்மானத்தை ஆதரி என்பது இந்தியாவை போர்க்குற்றத்திலிருந்து நாம் தப்பிக்க வைக்கிறோம். மேலும், இந்திய அரசை அம்பலப்படுத்த வேண்டும்.

இருப்பினும் பரவாயில்லை.  இப்பொழுது தானே போராட துவங்கி இருக்கிறோம். சரி தவறு என விவாதித்து சரியான பாதைக்கு விரைவில் வந்துவிடுவோம்.  அதனால், நம்பிக்கை இருக்கிறது.

மக்கள் எழுச்சியில் போகிற போக்கில் பல்வேறு குப்பைகள் அடித்து செல்லப்படும் என்பார்கள். இந்த போராட்டத்திலும் அப்படிப்பட்ட காட்சிகள் நிறைய காண கிடைக்கின்றன. நேற்று நாரயணசாமி அலுவலகத்தை முற்றுகையிட்டு இருக்கிறார்கள்.  கருணாநிதி மத்திய கூட்டணியிலிருந்து கழன்று கொள்வேன் என வீராவேசம் காட்டியிருக்கிறார்.

இந்த மக்கள் போராட்டம் வலுக்க வலுக்க எதிரிகள் யார், நண்பர்கள் யார் என நன்றாக புலப்படும்.  விரைவில் சரியான திசைவழியில் பயணப்படுவோம்.

உணர்வுகள் - இந்த வாரம்!

முழுக்க முழுக்க வியாபாரத்திற்காக எடுக்கப்படும் படங்கள் படு மொக்கையாக வெளிவரும் பொழுது மனம் சந்தோசப்படுகிறது.  சமீபத்திய சந்தோசம் - 'அலெக்ஸ் பாண்டியன்'

விமர்சனம் - இங்கே!

இந்த படத்திற்கான விளம்பரத்தில் ஏன் அனுஷ்காவை பயன்படுத்தவில்லை என்பது இன்னுமொரு ஆச்சர்யம்!

****

'புத்தக சந்தை' விளம்பரங்கள் பார்க்க பார்க்க மனம் போக துடிக்கிறது.  இந்த முறையும் ஆயிரம் ரூபாய்க்கு மேலாக வாங்கவும் பணம் தயார் செய்துவிட்டேன்.  ஆனால், கடந்த ஆண்டுகளில் வாங்கிய புத்தகங்கள் எல்லாம், படிக்காததால், தினமும் என்னைப் பார்த்து இளக்காரமாய் சிரிக்கின்றன.  கொஞ்ச நாளைக்கு ஒளித்து வைத்துவிடலாம என யோசித்துக்கொண்டிருக்கிறேன்.

****

பொங்கல் பண்டிகை விடுமுறையில் ஊருக்கு கிளம்ப தயாராகி கொண்டிருக்கிறேன். நாலு நாட்கள் ஊர்ப்பக்கம் போய் நண்பர்கள் பலரையும் பார்த்துவரலாம்.  பொங்கல் பண்டிகை உழவு சார்ந்த பண்டிகை.  காவிரி நீர்ப்பாசன விவசாயிகளில் இதுவரைக்கும் 10 பேர் வாடிய பயிரைக் கண்டு, கடன்கள் கழுத்தை நெறிக்க  தற்கொலை செய்திருக்கிரார்கள்.  நியாயமான நிவாரணத்திற்காக இரவு பகலாக முற்றுகை போராட்டம் நடத்திக்கொண்டிருக்கிறார்கள். இந்த பொங்கலை 'கருப்பு பொங்கலாக' அறிவித்திருக்கிறார்கள்.

சில ஆண்டுகளுக்கு முன்பு என் நண்பன் நகரவாசிகளைப் பார்த்து 'வீரபாண்டிய கட்டபொம்மன்' வசனம் போல...

விவசாயிகள் மக்களுக்கு எல்லாவித தானியங்களையும் உயிரைத் தந்து உற்பத்தி செய்து தருகிறார்கள்.  அவர்களுக்கு கிடைப்பதோ நியாயமான விலை கூட கிடையாது.  ஆனால், அந்த விவசாயிகளுக்காக, நகரவாசிகளாகிய நாம், காவிரி நீர் தராமல் இருந்ததற்காக தெருவில் இறங்கி போராடினோமா?  முல்லை பெரியார் அணையை இடிக்கப்போகிறேன் என திமிராக அறிவித்த கேரள அரசை எதிரித்து போராடினோமா?  உனக்கு எதற்கு நான்கு நாட்கள் விடுமுறை? என்ற கேள்வி தான் நினைவுக்கு வருகிறது.

*****

குற்றாலம்! அருவியின் நடனம்!

தமிழ்நாட்டில் பார்த்திராத பல இடங்கள் பல இருக்கின்றன. திரும்ப திரும்ப சென்ற இடங்கள் நிறைய இருக்கின்றன.  ஆனால், ஆண்டு தோறும் போய்வரும் ஒரு இடம் குற்றாலம். மதுரையை சுற்றிக்கொண்டிருந்த காலம் வரைக்கும் எப்பொழுது சீசன் களை கட்டுகிறதோ அப்பொழுது நண்பர்களுடன் குற்றாலத்திற்கு பஸ் ஏறிவிடுவதுண்டு!

குற்றாலத்திற்கு முன்பே 5 கிமீ தொலைவில் இருக்கும் தென்காசியை அடையும் பொழுதே, குற்றாலத்தின் மணம் காற்றில் மிதக்கும்.  இதமான காற்று உடலை வருடும்.

குற்றாலத்தை நெருங்க நெருங்க உள்ளுக்குள் மனம் பாட ஆரம்பித்துவிடும். மேக கூட்டம் அலைந்து கொண்டே இருக்கும். எப்பொழுது கருமேகமாய் அடத்தியாய் வருகிறதோ,  அப்பொழுது விழும் சாரல். லேசாக அடிக்கும் வெயில். சாரல், இதமான வெயில் என மாறி மாறி செல்லும். இந்த விசேஷ குற்றாலத்திற்கென்றே சிறப்பான துண்டுகள் விற்கப்படுகின்றன.

எங்கு திரும்பினாலும் மக்கள். ஒன்று குளிக்க போய்கொண்டு இருப்பார்கள்.  அல்லது குளித்துவிட்டு வந்துகொண்டிருப்பார்கள்.  மக்களின் சந்தடி எல்லாம் விலக்கிவிட்டு, கொஞ்சம் காதுகொடுத்து கேட்டால், அருவியின் சத்தம் மெல்ல கேட்கும்.  நம்மை செல்லமாய் அழைக்கும்.

போய் சேர்ந்ததும் ஒரு விடுதியில் அறையை பிடித்து, சுமைகளை போட்டுவிட்டு, உடனே குளிக்க கிளம்பிவிடுவோம். அருகில் இருப்பது மெயின் அருவி. குளிப்பது சுகம். அருவியில் குளிப்பது சுகமோ சுகம். குளிப்பது என்பது சாதாரண வார்த்தை.  குதூகலிப்பது. விளையாடுவது தான் சரி.

எவ்வளவு நேரம் குளித்தாலும், எத்தனைமுறை குளித்தாலும் அருவியின் குளியல் அலுக்காது. காடுகளின் வழியே, பல மூலிகைகளின் வழியே பயணப்படுவதால், குற்றால அருவியின் நீர் உடலை தொந்தரவு செய்வதில்லை.

பழைய குற்றாலம், ஐந்தருவி, புலியருவி, சிற்றருவி என ஒவ்வொரு அருவியும் ஒவ்வொரு வகை. மக்கள் அடுத்தடுத்த அருவிகளில் குளிக்க பயணப்பட்டுக்கொண்டே இருப்பார்கள்.

அருவியைப் பற்றி ஒரு பதிவு எழுதினால், மனசு ஆறாது.  இன்னும் நிறைய எழுதுவேன்..

கூடங்குளம் : பகத்சிங்குகள் எழுவார்கள்!

கடந்த ஆறு மாதத்திற்கும் மேலாக, கூடங்குளம் மற்றும் அதனைச் சுற்றி உள்ள மக்கள் தங்கள் வாழ்வாதாரம் பாதிக்கப்படும்! அதனால் அணு உலையை இழுத்துமூடு என போராடிவருகிறார்கள்.

60 ஆண்டுகளாக துவங்கிய காலத்திலிருந்து, ஒருமுறை கூட வாய் திறக்காத இந்திய அணு சக்தி துறை இரண்டு, மூன்று சந்தேகங்களுக்கு மட்டும் பதில் சொல்லியது. பிறகு, எல்லாம் இராணுவ ரகசியம் என மற்ற பல கேள்விகளுக்கு பதில் சொல்ல மறுத்தது. இனி, பதில் சொல்ல முடியாது என திமிராக அறிவித்தது.

அதன்பிறகு, ஜெ.வின் ஆட்டம். போராடும் மக்களுடன் உடன் இருப்பதாக முதலில் நம்பிக்கை ஊட்டினார். அணு உலை ஆதரவாளரான சீனிவாசனை போட்டு, அணு உலை பாதுகாப்பாக இருப்பதாக அறிக்கை பெற்றார். இடைதேர்தல் முடிந்த கையோடு, தனது பாசிச முகத்தை காட்டத்துவங்கிவிட்டார். மத்திய அரசு தன் பங்குக்கு இராணுவத்தையும், ஜெ. தன் பங்குக்கு காவல்துறையையும் போராடுகிற மக்கள் மீது ஏவிவிட்டிருக்கிறார்கள்.

இந்திய ராணுவம் இந்தியாவை அந்திய சக்திகளிடம் காப்பாற்ற இருக்கிறது! காவல்துறை உங்கள் நண்பன் என்கிறார்களே! இரண்டு கருத்துகளுமே நமது மனப்பிராந்தி என்பதை நடைமுறையில் நிரூபித்திருக்கின்றன. அந்த போராடும் வீரமான மக்கள் இந்த நெருக்கடியையும் நொறுக்கி, மீண்டுவருவார்கள். தள்ளி தள்ளி இருக்கிற நாம், அணு உலை எதிர்ப்பு போராட்டங்களை மாநிலம் முழுவதும் கட்டியமைக்கவேண்டும். வெகுஜன மக்கள் போராட்டங்கள் மூலம் தான் இதுவரை நமக்கான உரிமைகளை பாதுகாத்து இருக்கிறது என்பதை நாம் மறந்துவிடக்கூடாது.

முகநூலிலும், ட்வீட்டிரிலும், தனிப்பட்ட தளங்களிலும் சமூக அக்கறையோடு எழுதுகிற நபர்கள் தாங்கள் ஏற்கிற அரசியல், அதனை நடைமுறைப்படுத்துகிற அமைப்புகளில் தங்களை இணைத்துக்கொண்டு செயல்படவேண்டும். அரசு வலுவான அமைப்பாக இருக்கும் பொழுது, நாம் மட்டும் தனிநபர்களாக சிதறி இருப்பது எப்படி சரியானதாக இருக்கமுடியும்?

பகத்சிங், சுகதேவ், இராஜகுரு தோழர்களின் நினைவுநாளில், இந்த தொடர் போராட்டத்தில், திருநெல்வேலி மண்ணிலிருந்து இந்திய விடுதலைக்கு புதிய பகத்சிங்குகள் எழுவார்கள்.